Украинските сили продолжуваат со неочекуваниот, брз напредок во североисточниот дел на земјата, освојувајќи повеќе од една третина од Харковската област за три дена.
Голем дел од територијалните придобивки на Украина беа потврдени од руското Министерство за одбрана во саботата.
Една од причините за брзото напредување на украинските сили во Харков е движењето на руските војници на југот на земјата. Имено, офанзивата на јужна Украина за која многу се зборуваше всушност беше дезинформативна кампања за одвлекување на вниманието на Русија од вистинската офанзива што се подготвуваше во регионот Харков.
„[Тоа] беше голема операција за специјална дезинформација“, изјави за Гардијан Тарас Березовец, поранешен советник за национална безбедност, кој сега е портпарол на бригадата Бохун на украинските специјални сили. „[Русија] мислеше дека ќе бидат на југ и ја премести својата опрема. Потоа, наместо да бидат на југ, имаше офанзива онаму каде што најмалку го очекуваа и тоа предизвика паника и бегство“.
На 29 август Јужната команда на Украина објави дека започнала долгоочекуваната офанзива во областа Керсон на југот на земјата. Украинските сили ослободија неколку села од окупаторите, но немаше значајно заземање на стратешки важни градови. А сепак, заземањето на едно село во Керсон одеднаш стана голема меѓународна вест.
Портпаролката на јужната команда на Украина, Наталија Кумениук, инсистираше на „режим на молк“ и привремено им забрани на новинарите да го посетат фронтот Керсон. Дел од специјалната операција вклучуваше пронаоѓање и запирање на доушници во делови на Харков под контрола на Украина, за да се спречат да пренесат информации за подготовките на Украина на Русите.
Медиумските гласини, сепак, беа доволни да ја испровоцираат Русија, која префрли опрема и персонал на јужниот фронт, вклучително и некои од регионот Харков. За тоа време, новото американско оружје пристигнуваше во Харков на украинската армија.
Руското Министерство за одбрана го потврди повлекувањето, опишувајќи го како престројување.
„Извршена е тридневна операција на повлекување и организиран трансфер на групата војници од Изум-Балаклија на територијата на Доњецката Народна Република“, изјави портпаролот на руското Министерство за одбрана Игор Конашенков.
Меѓутоа, она што Русите не го спомнуваат е големото количество воена опрема што ја оставиле при нивното бегство. Снимките од бојното поле откриваат напуштени тенкови, оклопни возила, камиони, па дури и недопрени складишта за муниција. Сето ова може да претставува огромен проблем за руската војска во наредните месеци.