Повеќе од 200 вооружени специјалци на косовската полиција, придружувани од оклопни возила, вечерва влегоа од јужниот во северниот дел на Митровица, јави Радио-телевизија Србија.
Специјалците влегле пеш во Северна Митровица, придружувани од бројни оклопни возила и се распослале низ градот, јавуваат новинарите од местото на настанот.
Засега е тензично, но нема инциденти.
Во меѓувреме граѓани на Северна Митровица, според медиумите, почнале да се собираат на улиците и разговараат за се што се случува последните денови, притоа дополнително кревајќи ја тензијата во градот.
Според порталот „Косово онлајн“, фрлени се и две шок бомби, но засега нема повеќе информации околу ова.
Портпаролот на Владата на Косово, Перпарим Крејзиу, вечерва за Радио Слободна Европа изјави дека на северот на Косово е испратена „само полиција“, демантирајќи ги медиумските извештаи во Србија дека специјалните единици биле испратени на северот на Косово.