Во врска со постапката за спроведување на Сашо Мијалков од КПД Струга на повторено судење за случајот ,,Титаник 2” ве информираме дека Управата за извршување на санкции ќе ги преземе сите активности кои се во нејзина надлежност и ќе направи вонреден надзор во установата за утврдување на фактичката состојба, велат од Министерството за правда.
Ќе се утврдува одговорност и ќе бидат санкционирани сите кои направиле пропусти, намерни или ненамерни.За извршениот вонреден надзор, јавноста ќе биде дополнително информирана.
Откако утринава екс директорот на УБК, Сашо Мијалков, не беше спроведен во Кривичниот суд на рочиштето за случајот „Титаник 2“, директорот на затворот во Струга, Ваљон Ќуља, за „Фокус“ појаснува дека судот направил техничка грешка и наместо за денес, наредбата за спровод на Мијалков била за 12 декември. Како што појаснува, токму затоа и Мијалков не бил спроведен, бидејќи за денеска воопшто не примиле наредба за спровод.
-Станува збор за техничка грешка од страна на Кривичниот суд. Во нашата институција најпрвин примивме наредба за спроведување на осудениот Сашо Мијалков на 28 ноември, за одредено рочиште на 12 декември. По оваа наредба постапивме и го испративме осудениот Мијалков на рочиште. Оваа судско рочиште беше одложено и потоа на 14 декември пристигна ново барање од Кривичниот суд за истото лице, но и во ова барање датумот на судското рочиште е истото од преходното барање, значи 12 декември. Значи евидентно е дека станува збор за техничка грешка, затоа во прилог ви ги испраќам и двете писма што ние како институција сме ги примиле. Настојуваме на транспарентност и соработка со сите институции, јавноста и секако медиумите, ни изјави директорот Ќуља за „Фокус“.
Директорот истакнува дека доколку е потребно тие и денеска ќе го спроведат Мијалков, односно за час и половина ќе го донесат во Кривичниот суд.
Инаку денеска во Кривичниот суд се одложи рочиштето за случајот „Титаник 2“, во кој обвинет е екс директорот на УБК Мијалков. Овој предмет застарува наскоро, односно кривичното дело за кое се гони „Примање награда за противзаконито влијание“ му застарува за четири месеци, или во април 2023 година. Тој се гони за учество во изборни нерегуларност на локалните избори во 2013 година.
Следното рочиште е закажано за во понеделник.
ВОНРЕДЕН надзор во затворот во Струга – се бара Сашо Мијалков и виновниците што не го спровеле на Суд
